الحزن في فلسطين

أسود قوي المرة دي

مش حزن م العادي

ولا دمع م العادي

حتى القمر في السما

رافض يطل الليلة دي

وبعيد يا بكرة بعيد

يا مين يجيب للي صايم 

فرحته بالعيد؟ 

يا مين يرد الميتين يا مين

يسرق من الإنسان تاريخه الحزين

ويرد له..

معنى الحيطان والبيبان

ويلاقي للكلمة اللي خايفة لسان

يا مين يلاقي دمعة للأحزان

جفت دموعنا.. وانتهى الإنسان

أرخص من الطلقة اللي بيموت بيها

أجبن من الكلمة اللي بيخبيها

ويا طالع الشجرة بتتاوب

يا نازل الشجرة في إيدك دم

دمك دا ولا حلفت تسقيها

تحتك يهود يا نازل الشجرة 

لو يمسكوك هيدقوا فيها أيديك

يا نازل الشجرة وماسك سيف

شوف العيال.. متنتورين تحتيك

زي قطن أبيض وشارب دم

زي قطن حزين وبيصرخ

والدنيا واقفة خيال مآتة كبير.. 

شايف ومش مهتم

شايل على كتفك غراب

مستني ياخد جتتك ويطير

بيقول: إذا أنهزم اليهود

أمريكا تنفع تبقى قاتل أجير

بيقول:

لو ننضرب بقنابل الفوسفور

أمريكا تنفع تبقى شاهد زور

شايل على كتفك حطام

شايل أخوك في الشنطة

سامع صراخ "يوسف" 

"7 سنين.. شعره كيرلي وأبيضاني وحلو" 

فات ع العساكر قطعوا له ايديه

الدم سال تفاح

حزنت نساوين المدينة عليه

وأبوك يا يوسف.. 

دمعته لجوه

واقف بطوله لا حول ولا قوة

بيرمم الروح اللي بتميل

شايفك في كل شهيد يا يوسف

وفي كل بيت.. ميت له عيل

شوفتك وأبوك.. 

عمال يقدم رجل

يأخر رجل

زي اللي خايف يصدق

إن اليهود.. بيزرعوا المسامير

وكل حاكم عربي جواه يهوذا

مش مبطل خيانة

مش مبطل دق

شوفتك يا يوسف.. مش نبي

بس صاحب حق

بيدفنوك.. 

تطرح إدانة 

لكل حاكم.. كان زمان نخاس

لكل حاكم جوه منه يهودي

بيقول في سره:

أمريكا تنفع تبقى عجل نحاس